Einfaldir og aðgengilegir verkferlar

Allir vinnuveitendur bera ábyrgð á að útbúa skriflega áætlun um öryggi og heilbrigði á vinnustað, óháð stærð hans. Vinnueftirlitið hefur umsjón með því og veitir nánari leiðbeiningar. Allir sem ætla að bjóða upp á skipulagðar ferðir innanlands verða að hafa öryggisáætlanir fyrir ferðir sínar. Ferðamálastofa veitir leiðbeiningar um gerð öryggisáætlana í ferðum. Gakktu úr skugga um að allt starfsfólk þekki öryggisferla og viðbragðsáætlanir og hafðu upplýsingarnar aðgengilegar og öllum skiljanlegar. Mælt er með að setja mikilvægar leiðbeiningar upp í myndrænu formi (t.d. verkferla og viðbragðsáætlanir) og þær hengdar upp á svæði þar sem starfsfólk sér þær í sínu daglega starfi.

Gátlisti fyrir stjórnendur um gerð einfaldra og aðgengilegra verkferla

Tryggðu að til sé skrifleg öryggis- og heilbrigðisáætlun fyrir vinnustaðinn, í samræmi við kröfur Vinnueftirlitsins
Settu upp öryggisáætlanir fyrir allar skipulagðar ferðir, samkvæmt leiðbeiningum Ferðamálastofu
Ákveddu skýrt hver ber ábyrgð á gerð, uppfærslu og eftirfylgni verkferla og viðbragðsáætlana
Hafðu öryggisferla einfalda, stutta og skýra, þannig að allt starfsfólk geti tileinkað sér þá
Tryggðu að allir starfsmenn þekki ferlana og fái viðeigandi fræðslu þegar þeir byrja eða þegar ferlar uppfærast
Gakktu úr skugga um að ferlar og áætlanir séu aðgengilegar á einum stað – bæði rafrænt og á vinnusvæði
Notaðu myndrænar leiðbeiningar, skýringarmyndir eða flæðirit fyrir helstu verkferla og hengdu þá upp þar sem starfsfólk fer reglulega um
Endurskoðaðu ferla reglulega, sérstaklega eftir frávik eða breytingar í starfsemi
Athugaðu hvort ferlarnir séu í raun notaðir í daglegu starfi – fáðu ábendingar frá starfsfólki og leiðréttu ef eitthvað er óljóst eða flókið
Hafðu opna samskiptaleið fyrir áhyggjur og ábendingar starfsfólks um ferla sem þarf að laga eða einfalda.