Sjóðheit stafræn vinnustofa á Suðurlandi
Hæfnisetrið lagði enn á ný land undir fót síðastliðinn föstudag og mætti á aðalfund Markaðsstofu Suðurlands á Hótel Geysi í hitabylgjunni. Þar héldum við ásamt Brynjólfi Borgari frá DataLab vinnustofu fyrir fundargesti tengda þróun í stafrænni tækni og áhrifum hennar á ferðaþjónustuna. Ólína okkar kynnti m.a. Ferðapúlsinn-stöðutöku á stafrænni færni fyrir ferðaþjónustuna og fræðslutorgið sem tengist honum og býður uppá ýmsar lausnir og stuðningsefni fyrir stafræna þróun. Brynjólfur Borgar sagði frá nýjustu þróun í gervigreindarlausnum eins og spunagreindinni sem er sannkallaður „sérfræðingur í vasanum“ og veitti ráðleggingar um innleiðingu tækninnar sem vert er fyrir ferðaþjónustuna að huga að. Fundurinn var sá seinasti í fundaröð um landið sem Hæfnisetrið hélt í samvinnu við Markaðsstofur landshlutanna og Samtök ferðaþjónustunnar. Það var afar ánægjulegt og hvetjandi að fá tækifæri til að eiga samtal við starfsfólk ferðaþjónustunnar vítt og breytt um landið og við hlökkum til næstu hringferðar!
sérfræðingur
