Námslínan í ferðaþjónustu var skrifuð af Fræðslumiðstöð atvinnulífsins og Hæfnisetri ferðaþjónustunnar í samstarfi við nokkra framhaldsskóla og símenntunarmiðstöðvar. Í lok árs var opnað fyrir raunfærnimat til styttingar á námi á móti námslínunni.

Framkvæmdaaðilar verkefnisins eru SÍMEY (Símenntunarmiðstöð Eyjafjarðar) og Fræðslunetið – símenntun á Suðurlandi og er það unnið í samstarfi við Hæfnisetrið. Niðurstöður um fjölda þátttakenda sem fóru í raunfærnimat og námið í framhaldinu munu liggja fyrir á þessu ári.

Markmið námslínu í ferðaþjónustu er að auka þekkingu, færni og fagkunnáttu fólks sem hefur áhuga á að vinna í ferða- þjónustu eða er þegar við störf innan geirans. Tilgangur námsins er jafnframt að efla sjálfstæði við algeng störf sem tengjast þjónustu við fjölbreyttan hóp ferðafólks og jafnframt að námið sé góður undirbúningur fyrir störf og áframhaldandi nám innan ferðaþjónustunnar.

Við upphaf reksturs áfangastaðastofa hringinn í kringum landið árið 2018, var unnin mikil greiningarvinna á helstu hlutverkum þeirra. Eitt af þeim verkefnum sem skilgreind voru er samstarf við Hæfnisetur ferðaþjónustunnar með það að markmiði að efla hæfni og gæði í greininni. Þar sem skilgreiningin á áfangastaðastofum sem reknar eru af Markaðsstofum landshlutanna, var nýtt skref í þróun á stoðkerfi ferðaþjónustunnar, tók við vinna við þarfagreiningu svo finna mætti bestu leiðir til öflugs samstarfs. Ýmsar leiðir hafa verið reyndar og er nú kominn mjög góður skriður á samstarfið sem skilar þekkingu inn á alla landshluta, hvatningu til góðra verka og stuðningi.

Menntamorgnar ferðaþjónustunnar sem sendir eru út á vefnum reglulega hafa vakið mikla lukku og hvatt ferðaþjónustuaðila til að bæta aðferðafræði sína í ýmsum þáttum starfseminnar ss. starfsmannamálum, stafrænni hæfni og markaðsmálum. Fundaröð hefur einnig verið sett upp í annað sinn þar sem boðið er til fræðslufunda og samtals í öllum landshlutum og hafa þeir verið vel sóttir. Lykillinn að árangri þar er samstarf Markaðsstofa landshlutanna og Hæfniseturs sem hafa sérsniðið fræðsluna að þörfum hvers landshluta.

Aukin hæfni og gæði hafa verið einn mikilvægasti þáttur í stefnumörkun ferðaþjónustunnar í fjölmörg ár. Samstarf í stoðkerfinu eins og nú er komið vel af stað skiptir miklu máli til þess að árangur náist. Unnið er með styrkleika beggja aðila og þannig næst að setja upp kraftmikið starf sem byggir á þekkingu og öflugu tengslaneti.